اليوم الذكرى السابعة لانطلاق حركة كفاية ،شاركت مع الحركة منذ بداية مظاهراتها و وقفاتها ، انضممت لها و كنت مشرفا فنيا لمنتداها (المندرة ) ، و كنت عضوا في اللجنة الاعلامية ،عرفت وقت ذاك بعاشق تراب مصر ،شاركت في اعتصام القضاة ومظارهات رفض التعديلات الدستورية التي شارك فيها د. عبد الوهاب المسيري فيها رغم مرضه و رغم ما لقى من تهديدات و تم القبض علي،أشارك في فعاليات الحركة حتى الآن في الشارع رغم ما لقيناه في مسيرتنا من ضرب و كرب و اليوم أكتب عنها عما تعلمت فيها !
في ذكرى ميلاد حركة كفاية، فخور انىتربيت فيها وهفضل فخور بانضمامى ليها من اليوم الأول لتكوينها وهفضل اقول وأفتخر إنى اتعلمت يعنى ايه سياسة على ايد الدكتور عبدالوهاب المسيرى ومعظم أعضاء كفاية، وهفضل أفتخر انى كنت من اول الناس إللى نزلت وقالت يسقط مبارك و عائلته،مش هنسى عمري و تاريخى فى كفايه ولا مع أعضاء كفاية إللى هفضل انحنى احتراما ليهم، أعظم تحية لحركة كفاية واعضائها ،خصوصا إللى مات منهم وساب فى رقبتنا المسؤلية.
تعلمت فى كفاية ان الانسان لازم يعيش بمبادئه اللى قررها ضميره مش إللى شافها على غيره!
تعلمت فى كفاية ان الفكره لازم تواجها بفكره غير كده يبقى انت خسرت قبل ماتبدأ اصلا!
تعلمت فى كفاية ان المبادئ مش بتتجزئ ولا بتتلون ولا بتتنسى ! المبادئ قائمة مادمت حى!
تعلمت فى كفاية ان الشجاع بكلمته اعظم وافضل من الشجاع بقوته!
تعلمت فى كفاية ان الخوف ملوش اي مكان فى جواك ووهم بيدخله الظالم جوانا علشان نخاف نعارضه!
تعلمت فى كفاية ان الانسان بيموت بس لما الخوف يملكه...
تعلمت فى كفاية ان عمر الأنسان بيتقاس بكلمة الحق ومواقفه إللى أخدها مش بالسنين والأيام!
تعلمت فى كفاية ان مفيش حاجه اسمها جبان وشجاع لكن فى حاجه اسمها ظالم ومظلوم..
تعلمت فى كفاية ان مش بأيدك تبقى ظالم او مظلوم لكن بأيدك ترجع حق مظلوم وتوقف ظالم!
تعلمت فى كفاية الأصرار والعزيمة والأيمان بالمبدأ والقضية مهما حصل!
تعلمت فى كفاية انى أحترم رأى غيرى مهما كنت ضده واناقشه بدل ما اهاجمه!
تعلمت فى كفاية انى احترم الأجتماعات ومواعيدها وتنفيذ قرار الأغلبية فى المظاهرات والوقفات!
شكرا حركة كفاية اتعلمت جواها كتير أوى مقدرش أحصيه في كلام ، من كل عضو فى كفاية ، من كل موقف تعلمت فكرة !
أنا على يسار الصورة و محمود ششتاوي على يمينها و يتوسطنا د.عبد الوهاب المسيري
ليست هناك تعليقات:
إرسال تعليق