معهد إعداد القادة فى حلوان ,, معسكر إهانة للمصابيين وإستغلالهم من الاخوان والمجلس العسكرى

بعد ما قرر صندوق رعاية المصابين لعمل معسكرات لأعادة تأهيل المصابين والمفروض انه معسكر للتأهيل والتدريب للمصابين لتحضيرهم لاستلام وظائف فى الحكومة إللى وعدهم بيها صندوق رعاية المصابين واللى جية بعد مطالبات ومظاهرات و دم كتير سال على الارض من بداية من احداث البالون الى احداث مجلس الوزرا وكل اللى حصل فى الفترة اللى بينهم .. وتم اختيار معهد إعداد القاده "بحلوان" مكان لإقامة معسكر إعادة تاهيل المصابيين, عدد المصابين تقريبا كان 250 شخص من جميع محافظات مصر ودا اول شىء كان صعب فى الموضوع لان فى مصابيين من الصعيد وبحرى اصابتها شديدة جدا وصعب عليهم اوى يتحركوا من بيوتهم حتى ف ازاى هيسافروا لمحافظة تانيه !! , المهم المصابين كلهم وصلوا المعسكر فى الوقت المحدد وكانت الصدمة الاولى اللى قبلتهم, ان المكان مهجور ودخلهوش بنى ادم من اكتر من سنتين تلاته .. المكان مردوم تراب وزبالة والمراتب هناك مرمية على الارض والحمامات تقرف والشجر اللى حوالين المبانى ميتة وحشرات غريبة .. وطبعا لأن المحتاج يركب الصعب ولان المصابين فى اشد الحاجة للوظيفة دى بعد ما كل موارد رزقهم انتهت بسبب اصابتهم, اتضروا انهم هما اللى ينضفوا المكان بنفسهم على قدر استطاعتهم,,

وبدأ اول ايام المعسكر وبدأت معاه اول محاضرات اعادة التأهيل للمصابين واللى اتفاجىء مجموعة من المصابين بأنها مهيه إلا محاضرات لغسيل مخ المصابيين واستغلال جهل معظمهم والحاجة للوظيفة .. وبدأت محاضرات غسيل المخ على ايد دكتور اسمه يسرى الكومى وكان استغلال المصابين سياساً عن طريق الفكر الاخوانى وزرع الفكر الاخوانى وتجميل صورتهم بطريقة غير مباشرة .. يعنى طول المحاضرات يفضل هو ومساعد ليه يقولوا اناشيد الاخوان وفى وسط الكلام تلميحات غير مباشرة عن الاخوان وتاريخ الاخوان وجهاد الاخوان والظلم اللى شافوه وازاى ربنا نصرهم وانهم الشرفاء الوحيدين فى البلد إللى بيحبوها بجد, ويفضلوا بعد كل كلمة يهتفوا هتافات وشعارات الاخوان منها هتاف وشعار الاخوان المشهور " الله اكبر ولله الحمد " وطبعا نشر افكار الاخوان تحت اسم الاسلام وسماحة الاسلام .. والمصابيين ولا فاهمة ولا عارفة وبيتعملوا بحسن نية .

وياريت على كدة بس, دا كمان غسيل مخ سياسى للمصابين بأن دور الثوار كده انتهى وان المصابين عملوا اللى عليهم وان اللى بيعملوا اى مظاهرات دلوقتى مش الثوار الحققيين وانهم بلطجية وان لازم الثورة تنتقل من الميدان للبرلمان لاعضاء مجلس الشعب اللى اخترناهم ولازم نسمع كلامهم وننسى بقى ميدان التحرير إللى بقى مليان بلطجية ومخربيين, وطبعاً الموضوع لا يخلوا ابدا من تجميل وتحسين صورة المجلس العسكرى وانه حامى حمى البلاد وان المتأمرين والخونة هما اللى بيهجموه علشان يخربوا البلد وان المجلس العسكرى اللى عملكم كل دا ولسه هيعملكم تانى ويساعدكم ..

طوال الاسبوع على كدة ,, غسيل المخ دا شغال ليل نهار .. وطبعا بقى مننساش استغلال المصابيين نفسهم والمتاجرة بأصابتهم مادياً واعلامياً, بأن حد كان بيلم توقيعات من المصابيين لتفويضة بأنه يعمل ائتلاف للمصابين ويتكلم بأسمهم وعلى لسانهم فى كل مكان وياخد اى قرار بدالهم, وفعلاً كتير من المصابيين مضوا على ورق الائتلاف دا ..

ونيجى بقى لأخر يوم فى المعسكر ولاكبر مصيبة فيه .. جوابات التوظيف للمصابيين وصلت .. طبعا كالعادة جمعوا المصابيين كلهم فى قاعة المحاضرات وفضلوا يدولهم درس طويل عريض عن دور المصابيين وتضحياتهم وفى وسط الكلام تلميع وتوضيح صورة الاخوان والمجلس العسكرى فى الثورة ودورهم العظيم فيها .. ونيجى للحظة توزيع الجوابات, قبلها مسك الدكتور يسرى الميكرفون وقال "يا جماعة الجوابات دى فضل ونعمة من عند ربنا وكل ما نوزع جواب لصاحبة نكبر كلنا ونقول الله اكبر ولله الحمد" وطبعاً المصابيين بحسن نية تصقف وفرحانة .. عرفنا منهم ان الجوابات والوظائف متوزعة على حسب المؤهل الدراسى مش على حسب ونوع الاصابة ودا طبعا ً كان صدمة لينا كلنا لأن المفروض تكون الوظيفة مناسبة للأصابة علشان المصاب يقدر يشتغلها بدون اى اعاقة ليه ولحالته .. وعرفنا ان المصاب اللى بدون اى مؤهل دراسى خالص الغير متعلم اى تعليم "جاهل" هيتعين فى وظيفة على الدرجة السادسة ( ساعى او فراش او ما شبة ذلك على حسب المكان ) وان المصاب المتعلم دبلوم او تعليم متوسط هيكون وظيفة على الدرجة الرابعة والمصاب المتعلم تعليم عالى ليسانس او بكاروليوس او دراسات عليا هيكون فى وظيفة فى نفس تخصصة على الدرجة التالتة, فقولنا ماشى نشوف وبدأوا يقولوا اسماء المصابين ويستلموا الجوابات ..

وتبدأ اخر فصول الصدمة والاهانة .. الوظائف غير ملائمة لحالات الاصابة عند المصابيين اطلاقاً يعنى واحد عندة شلل فى ايدية الاتنين يتعين فى قسم ميكانيكا فى مصنع وواحد تانى عندة شلل فى رجلة يتعين فى وظيفة لازم يكون واقف على رجلة طول النهار وهكذا .. الفضيحة الكبيرة بقى كانت الدرجات الوظيفية, يعنى حد من المصابيين غير متعلم ولاعمرة دخل مدرسة ولا عدى من جنبها حتى وجالة التعيين فى .... تفتكروا فين !!؟ جالة التعيين فى وزارة التربية والتعليم والمصيبة الاكبر على الدرجة التالتة .. وحد تانى من المصابيين معاه بكارليوس هندسة جالة التعيين فى .... عارفين فين !!؟ المجلس المحلى على الدرجة السادسة ( ساعى او فراش ) ودا حصل مع مجموعة كبيرة اوى من المصابيين, ولما راحوا يشتكوا قالولهم ابقوا رحوا مقر التنظيم والادارة اشتكوا هناك وهما هيبقوا يصلحوها, وبعدين مش كفاية جبنالكم وظايف ..

طبعاً دا كان جزء بسيط من معاناة المصابيين اليومية واهانتهم بكل الطريق دا غيرتسولهم لحقوقهم وتسولهم للعلاج والرعاية والمعاملة الحقيرة اللى بيشفوها فى المستشفيات .. وحتى الكارنية اللى استلموه والجنزورى طلع وقال انه يقدر يركب اى مواصلات او يدخل اى مستشفى بيه يتعالج طلع الكارنية غير مُفعل ومفيش مكان بيعترف فيه, وتستمر رحلة معانة المصابيين وإذلالهم فى ثورة قامت على تضحياتهم ودمائهم

• ملحوظة: كل الكلام دا موثق يفيديوهات وشهادات من عدد كبير من المصابيين اللى حضروا المعسكر وانا منهم وشاهد بنفسى عن ما حدث .. عمرو جيفارا احد مصابى الثورة بالرصاص الحى

http://www.facebook.com/note.php?note_id=359506764072861

فأرجوكم ارحموا المصابيين .. كفوا ايديكم الحقيرة وانفسكم العفنة عنهم .. اتركوهم لمواجهة مصيرهم بعيداً عنكم

المجد للمصابيين .. المجد للشهداء .. الثورة مستمرة

Amr Guevara

1/3/2012